طب ازاي؟
الجسم اللي بكلمك عنه ده تم تسميه "3I/ATLAS"... وحسب بيانات الرصد الفلكي، فهو سرعة حركته في الفضاء مذهلة؛ وبتوصل لحوالي 200 ألف كيلومتر في الساعة... وعشان كده الفلكيين أول ما شافوه، قالوا انه مش بينتمي لمجموعتنا الشمسية أصلًا، وإنه جاي من نظام شمسي آخر، منعرفش هو فين ولا جواه أيه...
بس الغريب فعلًا بقى مش كل ده... الغريب هو إن في واحد من أشهر علماء الفلك في العالم، بيقول دلوقتي إن الجسم ده في الواقع مش جسم طبيعي، ومش مذنب ولا كويكب... بل هو سفينة فضاء متطورة باعتاها حضارة فضائية مجهولة للعلم البشري، بغرض إنه يتجسس على الأرض ويراقبها... وإن نيته تجاهنا ممكن تكون عدائية!
طب يا ترى إيه أصل الحكاية، وهل فعلًا فيه خطر بيهدد كوكب الأرض حاليًا؟!سيب بقى اللي ف إيدك وتعالى معايا نخرج من كوكب الأرض شوية بحروبه ومؤامراته ومشاكله وبلاويه، وهات ف إيدك كوباية الشاي بالنعناع الجميلة 
وخليني أحكيلك عن الموضوع الغريب اللي قالب الصحافة والسوشيال ميديا العلمية بقاله أيام ده! 
وخليني أحكيلك عن الموضوع الغريب اللي قالب الصحافة والسوشيال ميديا العلمية بقاله أيام ده! 
شوف يا سيدي...الموضوع بدأ يوم 1 يوليو اللي فات، لما تلسكوب عملاق في تشيلي تابع لوكالة ناسا اسمه "ATLAS" اكتشف جسم ضخم وغريب جاي في اتجاهنا من مصدر مجهول خارج نظامنا الشمسي...
الجسم ده حجمه حوالي 12 ميل، (تقريبًا 19 كيلومتر)، يعني تقريبًا أكبر من مدينة كاملة، وماشي بسرعة رهيبة بيقدرها العلماء حسب بيانات التليسكوب بحوالي 60 ميل، أو ما يقرب من 100 كيلومتر تقريبًا، في الثانية الواحدة!
الحدث ده لما تم الإعلان عنه، أثار فضول وخيال العلماء في العالم كله، عشان فكرة إننا نرصد جسم جاي من خارج المجموعة الشمسية بشكل مباشر دي، محصلتش غير مرتين فقط في تاريخ البشرية كلها... بس في البداية العلماء قالوا إنه غالبًا مذنب عادي جاي من الفضاء، وهيعدّي جنب الشمس في أكتوبر الجاي ويمشي في طريقه بسلام"...لكن اللي حصل بعد كده كان غريب...
الدكتور "آفي لوب Avi Loeb" من جامعة هارفارد، اللي هو واحد من أكبر وأهم علماء الفضاء في العالم، واللي دايمًا عنده أفكار جريئة وغريبة، بدأ يحلل الجسم ده وطلع بنظرية غريبة، بتقول ان الجسم ده ممكن يكون مش مذنب طبيعي... وانه ممكن يطلع عبارة عن مركبة فضائية جاية من حضارة تانية بتراقب الأرض، وبتشكل تهديد مباشر على الحضارة البشرية!طب ثانية واحدة...
دلوقتي الراجل ده مش عالم أي كلام، ومش شخص مجهول.. ده عالم كبير وله إسمه ووزنه في المجتمع العلمي... ف إيه الأسباب اللي ممكن تخلي بروفيسور كبير زي ده يقول كده؟!
الأسباب اللي طرحها الحقيقة كانت فعلًا غريبة ومثيرة للشك... 
أول سبب حسب كلامه؛ هو إن المسار أو الـ Trajectory اللي الجسم ده ماشي فيه هو مسار عجيب جدًا، عكس حركة دوران كواكب المجموعة الشمسية، لكنه في نفس الوقت متناسب مع مستوى حركة ومدار كوكب الأرض بالذات... واللي في الصورة تحت ده شكل المدار وحسب كلام "لوب"؛ فاحتمالية ان المسار ده، وكمان سرعة الإنطلاق الرهيبة اللي هو ماشي بيها دي تكون طبيعية، هي أقل من 0.2% فقط... يعني احتمال صعب جدًا ان الحركة دي تكون طبيعية وبدون تدخل من مُسبب صناعي!
تاني سبب بقى بيقولك ان الجسم ده هيختفي عن أنظارنا لما يعدّي ورا الشمس في أواخر شهر أكتوبر اللي جاي... ودي من وجهة نظر "لوب" هي فرصة مثالية لأي حضارة ذكية تبعت "أجهزة تجسس" أو "أسلحة" من غير ما نلاحظ... ولو هو مخطط إنه ياخد موقع استراتيجي عشان يقوم بمهمته، فهو مكانش هيلاقي مسار احسن من ده يمشي فيه..
وثالث سبب، واللي هو أغرب سبب فيهم كلهم، فهو إن حسب بيانات وسائل المحاكاة اللي عملتها وكالات الفضاء على مساره وسرعته بعد ما تم اكتشافه، فهو بشكل شبه مؤكد دخل حدود المجموعة الشمسية بتاعتنا، من حوالي 8000 سنة!
يعني بمعنى أدق وأوضح، الجسم ده اخترق سحابة أورت Oort Cloud اللي بتحيط بمجموعتنا الشمسية من بره على مسافة حوالي 5000 وحدة فلكية Astronomical Unit تقريبًا (الوحدة الفلكية هي وسيلة قياس مسافة بيتم تقديرها بمتوسط المسافة بين الأرض والشمس)، من أكتر من 8 ألفيات من السنين... وبكده فهو هيبقى وصل عندنا في نفس الفترة من التاريخ تقريبًا اللي بدأت فيها حضارات العالم القديم توثق تاريخها وتدونه... وهو ده اللي أثار شكوك "لوب" أكتر...
هل دي صدفة، ولا الموضوع مقصود، وفي حضارة تانية كونية بتراقبنا من زمان، ونواياها مجهولة؟
طبعًا زي ما انت متخيل، الكلام ده أول ما اتنشر في الصحافة، الدنيا على السوشيال ميديا اتقلبت، وطلعت ناس بتقول إن ده "سلاح فضائي" أو "مركبة تجسس" ممكن تتسبب في كارثة للأرض في خلال شهور، وإن لازم الحكومات تستعد من دلوقتي...والمشكلة ان نفس العالم ده، اللي هو "أفي لوب"، قال نفس الكلام بردو سنة 2017 على جسم فضائي تاني غريب جاي من خارج المجموعة الشمسية، إسمه الفلكي "أومواموا oumuamua"... ووصفه بإنه عبارة عن مسبار استكشاف باعتاه حضارة فضائية غير أرضية، وإنه جاي في مهمة استطلاع... ولحد النهارده ما زال كلامه ده مثار جدل بين العلماء...
فـ طبعًا لما قال الكلام ده على الجسم الجديد بتاع المرة دي، كلامه عمل بلبلة كبيرة جدًا في الوسط العلمي، وفي ناس كتير هاجمته وقالت إن كلامه واستنتاجاته مبالغ فيها وإن ده مجرد مذنب طبيعي ومفيش أي دليل قوي يثبت كلامه... بس الفكرة بقى إن "لوب" دعم كلامه بحاجة محيرة وغريبة جدًا... الجسم ده لو مذنب فعلًا حسب علماء الفلك ما بيقولوا، فهو المفروض يكون له ذيل واضح، أو يكون في مواد متطايرة بتتبخر من على سطحه أثناء سفره في الفضاء... لكن المشكلة إن مفيش أي تليسكوب رصد أي مواد متطايرة ملحوظة منه لحد دلوقتي، برغم انه اقترب بشكل كبير من الشمس... وده معناه ان احتمال كونه مذنب أو جسم فضائي طبيعي هو احتمال ضعيف... ده حسب كلامه طبعًا...
وعشان كده، فهو وجه اقتراح مثير جدًا لوكالة ناسا، وطالبهم رسميًا بإنهم يستغلوا الفرصة دي ويبعتوا المركبة الفضائية أو المسبار "جونو Juno" اللي بيلف حوالين كوكب المشتري دلوقتي، في مسار جديد يخليه يتقابل مع الجسم الغامض ده في شهر مارس من سنة 2026، عشان نقدر نعرف بشكل نهائي هو إيه بالضبط! والغريب إن الحسابات الأولية أثبتت إن الفكرة دي ممكنة، ولو ناسا وافقت وبعتت المسبار ده فعلًا، فـ دي ممكن تبقى واحدة من أهم المهمات الفضائية في تاريخ البشرية كلها... اللحظة اللي نشوف فيها بعيوننا جسم فضائي من خارج المجموعة الشمسية.. سواء كان من حضارة ذكية، أو من مصدر كوني طبيعي!
فـ يا ترى بقى أيه الحقيقة؟هل فعلًا في مركبة فضاء من حضارة مجهولة بقالها سنين بتراقبنا وجاية علينا دلوقتي؟ وهل هوليوود وأفلامها كانت بتمهد عقولنا للكشف عن موضوع زي ده بقالها سنين طويلة؟
ولو السيناريو حقيقي فعلًا، إزاي العالم ممكن يرد؟ وهل إحنا أصلًا مستعدين لأي نوع من التواصل مع حضارة غير بشرية؟
ولا على العكس من كده، تفتكر الموضوع كله مش أكتر من مذنب طبيعي زيه زي ملايين المذنبات التانية، وكل الحكاية دي هي مش أكتر من خيال عالم متحمس حبتين؟الإجابة هسيبها لخيالك انت...
وفي النهاية كالعادة هسيبلك مصدر كل المعلومات دي في المصادر تحت في أول كومنت ولو وصلت لهنا واستفدت من الموضوع اللي قرأته ده وأثار خيالك، متنساش تعمل شير عشان غيرك يشوفه والموضوع يوصل لناس أكتر ويعرفوا أيه اللي بيحصل على بعد ملايين الكيلومترات من كوكبنا دلوقتي...
Tags:
أخبار العالم